Kal raat, anjaane mein,
Karvat badalkar,
Tum baahon mein mere so gaye the,

Sapna haseen koi,
Dekha tha tumne shaayad,
Honth tumhare khil rahe the,

Neend abhi apni
Halke pairon ki naazuk ungliyon se
Palkon ko mere sehla rahi thi,

Yeh dil apne
Dhadkanon ki lay mein, lori gaake,
Mann ko mere sula raha tha,

Ek boond jabhi
Tumhari aankhon se umadkar,
Seene pe mere aa utri thi,

Ek awaaz tabhi
Tumhare dil se nikalkar,
Kaanon tak mere aa pahunchi thi,

Anjaane mein,
Keh diya tha tumne,
Sach jo ab tak kaha nahi tha,

Hothon pe apne,
Liya tha tumne naam,
Woh jo mera nahi tha,

Khud ke dard ko,
Khud ko bhulakar,
Zakhmon pe teumhare marham lagaya,

Haath badhaya
Tumhare aansuon ko ponchne,
Apne hi ashqon ko rok na paaya,

Ehsaas hua hai ab mujhko,
Yeh paani ek hai jisme hum tair rahe hain,
Kinaare magar, alag hain,

Ek hain alfaaz humare,
Jisme dard jata rahe hain,
Dard magar, alag hain,

Wajah alag hain, dawa bhi..

Advertisements